TURKIY GULISTON YOXUD AXLOQ

Atoqli oʻzbek adibi, mashhur dramaturg va pedagog-maʼrifatparvari, jadidlar harakatining yetakchilaridan biri Abdulla Avloniyning (12.07.1878– 25.08.1934) ilmiy-adabiy merosi orasida „Turkiy Guliston yoxud axloq“ asari alohida tilga olinadi. Boisi mazkur asar oʻz mohiyati bilan oʻzbek tilida yozilgan ilk „Odobnoma“, „Axloq fani“ darsligidir. Mazkur asarning ahamiyatli jihati, uning tom maʼnodagi millat fidoyilari, vatanparvar fuqarolarni shakllantirish gʻoyasi bilan sugʻorilganligida ifodalangan. Ushbu kitob uni mutolaa qilgan har bir oʻquvchiga hayotdagi barcha goʻzal insoniy fazilatlarga ega boʻlish, shuningdek, turli illatlardan saqlanish, inson uchun eng ulugʻ neʼmat – umrni halol va pok yashab oʻtishdan, sharqona madaniyat va odobdan saboq beradi.