YO'LBARS OVCHILARINING G'AROYIB SARGUZASHTLARI

Dhan Go'pal Mukerji (1890–1936) Kalkuttadan uncha uzoq bo'lmagan, changalzorlar vodiysi sanalgan Kajangal qishlog'ida tug'ilgan. Uning otasi sog'lig'i sababli o'z kasbi advokatlikni tashlab, musiqa bilan shug'ullanadi va keyinchalik qishloq ibodatxonasida diniy ulamo sifatida faoliyat olib boradi. Dhan Go'pal dastlab Kalkutta universitetida o'qiydi, keyinchalik Yaponiya hamda Amerikaning San-Fransisko va Nyu-York shaharlariga borib, sanoat korxonalarini jihozlash borasida malaka oshiradi. Uch yil Bordidagi Kaliforniya, so'ng Stenford universitetlarida o'qib, metafizika yo'nalishi bo'yicha bakalavrlik darajasiga erishadi. San-Fransiskoda uning dastlabki she'rlar to'plamlari dunyo yuzini ko'radi. 1920-yillarda Nyu-Yorkka qaytib, ijod qilishga astoydil kirishadi. 1922-yilda ajoyib fil – Kari haqidagi kitobi muvaffaqiyat qozonadi. 1928-yilda esa uning “Kabutarlar tarixi” kitobi – bolalar uchun yozilgan yilning eng yaxshi kitobi sifatida e'tirof etiladi va Amerika kutubxonalar assotsiatsiyasining Nyuberi medaliga sazovor bo'ladi.