Zamonaviy Amerika romanlari

Zamonaviy AQSH adabiyoti barcha (proza (nasr) va poeziya (nazm), dramaturgiya) janrlarda, turli (realizm va romantizm, modernizm va ekzistensializm) uslublarda jahon kitobxonlari eʼtiborini tobora oʻziga jalb etayotgan, tanqidchilar tomonidan yuqori baholanayotgan asarlarga boy. Yaqin vaqtgacha oʻzbek kitobxonlari tomonidan Amerika adabiyoti asosan Mark Tven, Edgar Allan Po, Jek London, Teodor Drayzer, Ernest Xeminguey, Rey Bredberi kabi adiblar orqali tasavvur etib kelinar edi. Bugunga kelib, tarjimonlarimiz tomonidan mamlakatimizning vaqtli matbuotida turli xil Amerika modern yozuvchilari asarlaridan tarjimalar eʼlon qilinishi oʻzbek kitobxonlarining zamonaviy AQSH adabiyotiga boʻlgan eʼtiborini oʻzgartirdi. Buni hisobga olgan holda, mazkur toʻplamda oʻquvchilar eʼtiboriga hozirgi davr AQSH romannavislarining asarlari havola etilmoqda. Shu paytgacha oʻzbek tilida «Zamonaviy Amerika romanlari» turkum holida chop etilmaganligi bois ushbu nashr adabiyot ixlosmandlariga munosib sovgʻa boʻlishidan umidvormiz.