AFANDINING QIRQ BIR PASHSHASI

Nasriddin Afandining hangomalari jahon boʻylab keng tarqalgan boʻlib, mazmun va mantiq jihatidan turlichadir. Ularning aksariyatida Nasriddin Afandi oʻzining aqli, zukkoligi va topqirligi, kulgisi bilan zamona zoʻrlarining, firibgarlarning haqiqiy basharasini ochadi, ularni yengadi, yakson qiladi. Ammo ba’zi bir latifalarda Nasriddin oʻta laqma, hatto firibgar sifatida talqin qilinadi. Xoʻsh, aslida Nasriddinimiz qanday odam boʻlgan? Hech shubha yoʻqki, u oʻqimishli, aqlli, tadbirkor, topqir, tegirmonga tushsa butun chiqadigan, haqiqatparvar, kambagʻalparvar odam edi. Uning sarguzashtlari, hikoyalari xuddi mana shu sababdan ham asrlardan asrlarga oʻtib kelmoqda. Zero, hayot ham, xalq ham gʻoliblarni xush koʻradi.