Alibobo va qirq qaroqchi: ertaklar

Arab xalq ertaklari turli millatlar tomonidan ardoqlab, sevib o'qiladi. Ularda insoniylik, kamtarlik, sof sevgi, halollik kabi umumbashariy qadriyatlar jozibali tasvirlanadi. Qo'lingizdagi kitobda arab xalq ertaklari turkumiga kiruvchi beshta hikoya o'rin olgan bo'lib, ular o'quvchini bevosita arab xalqlari hayoti bilan yaqindan tanishtiradi. Ertaklarda tasvirlangan voqealarning hech biri o'quvchini befarq qoldirmaydi. Xususan, «Alibobo va qirq qaroqchi» ertagi qahramoni Alibobodagi rostgo'ylik, halollik, Marjonadagi ziyraklik, uddaburonlik har qanday kishini mushohadaga undashi shubhasiz. «Bo'zchi murajjim» ertagidagi voqealar esa kitobxonga o'zgacha zavq bag'ishlaydi. Asli kasbi bo'zchi bo'lgan Usfur laqabli kishining harakatlari o'quvchida kulgi uyg'otadi. Arab xalq ertaklari yosh kitobxonlarni ezgulik va yaxshilikka undashi barobarida ularga hayotning turli to'siqlari-dan yengilmay, mardona o'tish kerakligini o'rgatadi. Garchi ertaklar o'zga millatlar hayotidan hikoya qilsa-da, ularni o'qigan o'quvchi adabiyot millat tanlamasligiga yana bir bor amin bo'ladi.