BIRINCHI MUHABBATIM

O‘z hayotida sevib-sevilmagan, muhabbat atalmish ajib bog‘dan gul uzmagan inson bo‘lmasa kerak. Bu boqiy va muqaddas tuyg‘u shoiru yozuvchilarimiz, baxshi, rassomlarimiz ijodining doimo bosh mavzusi bo‘lib kelgan. “...Birinchi muhabbat!” Bu sehrli so‘z jaranglashi bilan har qanday odamning ko‘ngil qatlarida yashirinib yotgan his-hayajon shirin bir entikish bilan yuzaga qalqiydi, yurak o‘rtanishlari go‘zal va rohatbaxsh xotiralarni yodga soladi. birinchi uchrashuv, birinchi sevgi izhori, birinchi iztirob... Aziz she’riyat muhiblari! Sizga taqdim etayotganimiz ushbu to‘plamda O‘zbekiston Qahramoni, O‘zbekiston xalq shoiri Abdulla Oripovning butun ijodi mobaynida ushbu o‘lmas mavzuda bitilgan she’ru g‘azallari jamlangan. Ular Sizni xushnud etadi, degan umiddamiz.