BOBO SO'Z IZIDAN

Bir kecha-kunduzda nechta soʻz ishlatamiz? Shu soʻzla-rimizning har birining asl mazmunini bilamizmi? Agar ishlatayotgan soʻzlarimiz maʼnosini toʻliq anglaganimizda edi, naqadar oʻzimizni, oʻzligimizni anglagan, tilga — elga — bizni ulgʻaytirgan shu zaminga sadoqatimiz, mehrimiz yanada ortgan boʻlur edi. Zotan, Soʻzdan uzoqlashgan odam oʻzidan uzoqlashadi. Oʻzidan olislab ketayotgan odamning maʼnaviyati ham, oʻzi ham zavolga moyildir. Oʻzbekistonda xizmat koʻrsatgan madaniyat xodimi, taniqli shoir Eshqobil Shukurning qoʻlingizdagi «Bobo Soʻz izidan» kitobi bevosita soʻzga, soʻzki, xalqimiz tarixiga tomirdosh boʻlgan, turkiy tillar oilasida xazinasi, jozibasi, rangu harorati, koʻyingki, sharafi baland asl oʻzbek soʻzlariga boʻlgan katta muhabbati tufayli, ularni asrab qolishdek ezgu niyat samarasi oʻlaroq maydonga keldi. Hayot ummonida suzib borayotgan Til kemasining har bir yoʻlovchisi shu ulugʻ ulov taqdiriga javobgar. Shu maʼnoda, «Bobo Soʻz izidan» kitobi maʼnaviy hayotimiz uchun bugun eng dolzarb asarlardan bittasi, desak, mubolagʻa emas. Shoirning soʻzlar tarixiga qilgan sayohatida unga yoʻldosh boʻlish sizga ham nasib etadi degan umiddamiz.