Buxoroning jin koʻchalari

Hurmatli kitobxon! Xalqimizning ulug' adibi Asqad Muxtor ushbu asari – "Buxoroning jin ko'chalari" tarixiy qissasida Buxoro jadidchiligining faol ishtirokchisi, "Yosh buxoroliklar" partiyasining rahbarlaridan biri, Vatanimizning mustaqilligi uchun kurashgan, Fitrat, Cho'lpon, Abdulla Qodiriy va boshqa o'zbek ziyolilariga g'amxo'rlik qilgan atoqli davlat va siyosat arbobi Fayzulla Xo'jayevning (1896-1937) o'smirlik yillarini tasvirlaydi. O'smirni o'qir ekansiz, otasining vafoti tufayli o'zi istamagan holda katta boylikka ega bo'lgan Fayzulloning ruhiy kechinmalariga duch kelasiz, tinimsiz o'zligini izlaganiga, hayotdagi maqsadini aniqlash yo'lida chekkan azob uqubatlariga guvoh bo'lasiz. Asar voqealari XX asrning boshida bo'lib o'tadi, lekin muallifni ko'proq o'sha davrning hozirgi zamon muammolariga hamohang masalari qiziqtiradi. Bu muammolar asosan yoshlar tarbiyasiga aloqador bo'lgan ijtimoiy-iqtisodiy qiyinchiliklar, iymon-e'tiqod, katta maqsadlar yo'lida shaxsiy manfaatlaridan kecha bilish, shaxs ma'naviyati, el-yurt mehri, vatan ozodligi, adolatsizlikka qarshi kurash kabilardir. Yozuvchiga XX asr boshida dunyo bo'ylab yuz berayotgan birinchi jahon urushi, vatanimizdagi murakkab va chalkash ijtimoiy vaziyat, yosh qahramonning uqubatli izlanishlari o'sha davrning muammolari haqida astoydil mulohaza yurgizish uchun ko'p imkoniyatlar ochib bergan.