Davrimiz darveshi

Jahon adabiy-badiiy, estetik tafakkuri tadrijida ijtimoiy – siyosiy, falsafiy, psixologik, ilmiy-fantastik, intellektual yoʻnalishdagi koʻplab romanlar mavjud boʻlsada, ilmiy-falsafiy-psixologik jihatdan bir butunlikdagi romanlar hali milliy adabiyotimizda yaratilmagan edi. Shu jihatdan taniqli adabiyotshunos olim Ilhom Gʻaniyevning mazkur yoʻnalishdagi eksperimental romani milliy adabiyotimizda oʻziga xos yangi hodisa deyish mubolagʻa boʻlmaydi. Bunday asarlarni yaratish uchun ijodkorlarning oʻzi kamlik qiladi. Yozuvchilikdan tashqari hozirgi bilim, mantiqiy tafakkur talab etiladi. Shu jihatdan mazkur romanni oʻqib tushunish uchun oʻquvchidan maʼlum daraja tayyorgarlik talab etiladi. Asar biz hozirgacha mutolaa qilayotganimiz anʼanaviy romanlar qoliplariga tushmaydi. U inson, tabiat, jamiyat taraqqiyotining eng umumiy qonuniyatlari, dialektikasi, insonni oʻz-oʻzini taftish qilishi va anglashi yoʻlidagi umumlashma xulosa. Roman konsepsiyasini ana shu muammoli masalalar tashkil etadi. Insonning tabiatan murakkab siyrat va suratiga koʻzgu tutib, tarixiy maqsadlarni koʻzlab yozilgan ushbu intellektual falsafiy roman umid qilamizki, kitobxonda ham gʻayrishuuriy ravishda ezgushi oʻz-oʻzini isloh qilish hissini uygʻotajak. Roman keng kitobxonlar ommasiga moʻljallangan.