Erkin Vohidov bir kuni...

Oʻzbekiston Qahramoni, Oʻzbekiston Xalq shoiri, xalqimizning faxri-gʻururi Erkin Vohidov ijodida hajviyot muhim oʻrin tutadi. Uning asarlarida tagdor yumor bor. Har qanday sanʼatkor ijodiyoti uning shaxsiyati bilan chambarchas bogʻliq. Muxlislarning taniqli ijodkorlar hayotiga qiziqishlari ham bejiz emas. Tomiri qushchakchaq askiyalar, betakror, serzavq qochirimlar vodiysi Fargʻonaga tutash Erkin Vohidov hayotda hazil-mutoyibaga moyil, oʻzi ham hazilkash, quvnoq odam edi. Shoirning gʻaroyib hazillari, betakror, mujazgina bexato uruvchi ajoyib lutflari, nozik, teran qochirimlari beixtiyor kishida zavq-shavq uygʻotadi, koʻngilga yorugʻlik olib kiradi, ayni chogʻda adabiy muhit haqida yorqin tasavvur beradi. Ushbu begʻubor hazil-hangomalar atoqli, ardoqli va quvnoq shoir siymosini kitobxon koʻngliga yanada yaqin qiladi.