Gʻalati oʻgʻri

Safar Kattaboyev uzoq yillardan buyon prokuratura organlarida ishlab keladi. Hayotni doimo ijodkor sifatida kuzatadi. Turli vaziyatlarga tushgan shaxslar qiyofasida avvalo inson taqdirini koʻradi, badiiy obrazlarini talqin qilishda qahramonlari tabiatidagi oʻziga xos jihatlarni nozik his etadi. Muallif bilib-bilmay jinoiy harakat sodir etib qoʻygan qahramonlari hayotini, ruhiyatini yaxshi biladi, ularning fojeasini chuqur badiiy tahlil eta oladi. Mavhum holatlarda sodir qilingan qotilliklar qanday fosh qilinadi? Ularni kimlar, nima uchun sodir qilgan? Barcha detektiv asarlarga xos boʻlgan ushbu savollar xususida professional huquqshunos-yozuvchi sifatida badiiy mushohada yuritadi. S. Kattaboyev oʻzining keyingi yillarda yozgan qissa va hikoyalarini toʻplab, “Gʻalati oʻgʻri” kitobini nashrga tayyorladi. Mazkur kitobda jamlangan asarlar kitobxonni insonning hayotdagi oʻrnini chuqur mushohada etishga undaydi.