Hayot sinovlarida matonatli boʻl

Taniqli yozuvchi va psixolog Ravshan Abdullaoʻgʻli 1978-yil Ozarbayjon Respublikasining Boku shahrida tugʻilgan. Ozarbayjon davlat iqtisodiyot universiteti hamda Moskva ilgʻor texnologiyalar va konsalting institutida tahsil olgan. Asarlari rus, turk, ingliz tillariga tarjima qilingan. Ravshan Abdullaoʻgʻlining «Orqadagi koʻpriklarni yondiring», «Har bir inson hukumdoridir», «Isyon», «Qoʻrquv nima?», «U», «Abaddon», «Balo va sabr» kabi asarlari orqali oʻquvchilar yaxshi tanib ulgurishdi. Adibning «Bu shaharda hech kim yoʻq» romani 2016-2017-yillarda Ozarbayjonda eng koʻp sotilgan kitob, deya eʼtirof etilgan. «Hayot sinovlarida matonatli boʻl» – insonning oʻz-oʻziga boʻlgan ishonchini mustahkamlashga qaratilgan, uni kurashuvchan boʻlishga va shu bilan birga, hech bir narsa bejizga, oʻz-oʻzidan sodir boʻlmasligini, har bir voqea-hodisa zamirida hikmat mujassamligini anglashga undaydigan psixologik-motivatsion asardir. Kitobda qiyinchiliklarga bardoshli boʻlish va ularni yengib oʻtish uchun inson hayotda nimalarga eʼtibor qaratishi lozimligi, bu jarayonda eng asosiy yordamchi ham, eng katta dushman ham uning oʻzi ekanligi alohida taʼkidlanadi. Astoydil harakat qilinganda esa har qanday qiyinchiliklarni yengib oʻtish mumkinligi asosli misollar vositasida yoritib berilgan. Yozuvchi oʻz fikrlarini ilmiy, shuningdek, diniy manbalardan keltirilgan misollar vositasida mustahkamlab, bular oʻquvchilarning mavzuni ravon tushunib olishini taʼminlaydi.