Hayotiy hikoyalar

Adibning «Allomalar haqida hangomalar», «Nashriyot hangomalari», «Mahalla hangomalari», «Mashaqqatli yillar hikoyalari», «Qaltis hazil», «Talabalik davri hangomalari» turkumlariga kirgan hajviy, yumoristik lavha, etyud, miniatyura, latifa, loflaru intermediya hamda jiddiy hikoyalari kitobxonni beeʼtibor qoldirmaydi. Bularda uzi yaqindan tanigan, mehr va ixlos qoʻygan atrofidagi odamlari: bugun hayoti va ijodiy faoliyatiga manba boʻlgan jonajon «Oʻqituvchi» nashriyoti jamoasi zakovatli shaxs va insonlari, oʻz ota-onasi, oilasi, jigarbandlari, qadrdon, sermuruvvat mahalladoshlari, tengdoshu ogʻayni-ulfatlari haqida badialar aks etgan. Toʻplamga kirgan bu latifanamo asarlar hayotiyligi, insoniy mehr va muhabbatga yoʻgʻrilganligi, serzavq va topqirligi, eng muhimi, hozirgi zamon intellektual isteʼmolchisi – turli yosh va saviyadagi kitobxonlarga badiiy xulosaning mohiyatini yigʻiq, sodda va ravon ifodalash bilan qimmatlidir.