HAYRAT KOʻPRIGI

Sheʼriyat – maʼnaviy hayotimizning ajralmas ruhi, komil insonlarning yoʻldoshi. Sheʼr – ruhiyat ozodligi. Sheʼr oʻqigan kishi xayolan hadsiz hududlarni kezib chiqadi, goʻzal tuygʻularga oshno tutinadi. Muhayyo Mirsaidovaning sheʼrlarida ham koʻngilning, ruhiyatning ozodligi tasviri bor. Oddiy va samimiy misralar qatida koʻngil kechinmalari, olam va odam haqidagi oʻylar, umr yillari va yoʻllaridagi orzu-armonlar boʻy koʻrsatib turadi. Ushbu toʻplamdan oʻrin olgan turli mavzulardagi rang-barang sheʼrlar ijodkorning oʻz muxlislariga aytadigan dil soʻzlari kabi jaranglaydi.