MATONAT manzumasi

“Vatanim deb seni uygʻondim, Daryo kabi uygʻoq, oʻturman” deb yozganida ustoz Hamid Olimjon tom maʼnoda farzandlik va shoirlik burchini nazarda tutgan edi. Yangi davru zamon shiddati, Vatanimiz fayzu kamoli barchamizdan bedorlik va daxldorlikni talab qilarkan, bir zum boʻlsa-da, befarq boʻlishga haqqimiz yoʻq. Davlatimiz Rahbari ezdoshlarimiz bilan boʻlgan uchrashuvlardan birida “Menga oʻzini, jonini qiynaydigan odamlar kerak!” deganida aynan shunday bedorlikni nazarda tutgan edi. Taʼbir joiz boʻlsa aytish mumkinki, bugungi kunda Yurt egasidan tortib, uning oddiy fuqarosigacha keng koʻlamli ijtimoiy-iqtisodiy va maʼnaviy islohotlar yoʻlida zavqu shavq va bunyodkorlik ishki bilan mehnat qilmoqda. “Biz yozmasak kim yozgaydir bu kunlarning “Hamsa”sin” deydi Oʻzbekiston xalq shoiri Sirojiddin Sayyid oʻzining “Matonat manzumasi” nomli mazkur kitobidan joy olgan bagʻishlovlaridan birida. Boysun shahri va uning atrofidagi qishloqlarda necha zamonlardan buyon toza ichimlik suviga tashna boʻlib yashayotgan aholining koʻp yillik orzu-armonlari aynan Prezidentimiz tashabbusi bilan qisqa muddatda roʻyobga chiqqani, bepoyon Ustyurt dashtlaridagi yangi-yangi konlar, ona diyorimizning eng shimoliy sarhadida qad rostlagan “Qoraqalpogʻiston” shaharchasining qanday matonat bilan bunyod etilgani-yu zahmatkash zamondoshlarimiz siymosi hayotiy, jonli misollar orqali ochib berilgan. Kitobning “Jaholatga qarshi maʼrifat”, “Adabiyot atomdan kuchli” deb nomlangan fasllarida bugungi globallashuv davrida yashayotgan ijodkor qalbi uygʻoq boʻlishi, ayni paytda adabiyot hamisha Prezidentimizning eʼtiborida boʻlib kelayotgani haqidagi yangi sheʼrlar, manzuma va maqolalar jamlangan.