Me'mor

O‘zbekiston xalq yozuvchisi Mirmuhsin Mirsaidov ushbu romanida o‘tmish meʼmorlarining hayoti, beqiyos sanʼati va o‘sha zamon ziddiyatlarini tasvirlaydi. Asarda nafaqat meʼmorchilik sanʼati, balki o‘sha davrdagi shohlar va shahzodalar orasida munosabat, avom xalqning qanchalar qiyin ahvolda ekanligi yorqin misollar bilan tasvirlab berilgan. Shuningdek, asarning asosiy qahramonlari – Najmiddin Buxoriy, Badia, Zavrak, G‘avvoslar obrazi orqali insoniy munosabat, adolat mezonlar, Vatan saodati, shuningdek, onalik muhabbati ham yorqin uslubda tasvirlangan. «Meʼmor»ning ushbu nashrida asar yaratilgan davrda keng ishlatilgan, biroq hozirgi kunga kelib isteʼmoldan chiqqan hamda yosh kitobxonlar uchun tushunarsiz bo‘lgan so‘z va iboralarining izohiga katta eʼtibor qaratildi. Bunda nafaqat eskiroq, tushunilishi qiyin bo‘lgan so‘zlarning sharhi, balki ularning qaysi til: arab, forsiy tillarga mansub ekanligi haqida ham qaydlar berib borildi, bu esa o‘z navbatida kitobxonning so‘z boyligining oshishiga xizmat qiladi. Qolaversa, kitobxon badiiy asarni o‘qish barobarida, ona tilimizning imlo qoidalarini o‘rganishi va o‘zida ko‘nikma hosil qilib borishini ko‘zda tutgan holda asarning mazkur nashri hozirgi o‘zbek adabiy tilining imlo qoidalariga moslangan holda berildi. O‘ylaymizki, bular kitob mutolaasi asosida sizning diqqatingizdan chetda qolmas degan umiddamiz!