MIRZO ULUʻGʻBEK

Maqsud Shayxzoda “Mirzo Ulugʻbek” asarida Ulugʻbekni “inson – olim – davlat arbobi” sifatida aks ettirishga intilgan. Ammo buning oʻzi ham oson ijodiy ish emas edi. Shubhasiz, Ulugʻbek fojiasini keltirib chiqargan bu hayotiy masalalarni oʻzaro aloqada va uzviy bogʻliqlikda tasvirlash Shayxzodadan katta mahoratni talab etadi. Mirzo Ulugʻbekning ham inson, ham olim, ham davlat arbobi sifatidagi obrazini badiiy mujassamlashirish uchun koʻplab personajlarni asar toʻqimasiga olib kirdi va bu personajlar harakat etajak syujet chiziqlarini ishlab chiqdi. Bunday personajlar tarixiy voqelikning oʻzida serob boʻlishiga qaramay, dramaturg ularni saralab ola bildi va shu bilan birga badiiy toʻqimadan ongli ravishda foydalanib, yaʼni toʻqima qahramonlar obrazini asarga dadil jalb eta oldi.