Musiqa dahosi

“Dunyo daholari” ruknidan joy olgan mashhurlarning har biri oʻz yoʻli, tafakkuri, ixtirolari, olamshumul ishlari va hatto, taqdirlari bilan dunyoni oʻzgartirishgan. Shunday taniqli insonlardan biri oʻz asarlari bilan mangulikka muhrlangan bastakor, yuksak mahoratli sanʼatkor Volfgang Amadey Motsartdir. U 36 yoshga yetmay vafot etgan boʻlsa-da, 620 dan ortiq tugallangan asarlar, koʻplab parcha va eskizlar qoldirdi. Deyarli barcha daholar singari Motsartni ham oʻz davrining insonlari tushunmagan, qadrlamagan. Ammo uning yorugʻlik, baxt, hayotga toʻla musiqasi hamisha odamlarni maftun qiladi, zavqlantiradi, eng yorqin va eng ezgu ishlarga undaydi. Bolalar va oʻsmirlarga moʻljallangan ushbu bejirim tuhfa oʻquvchilarga manzur boʻladi, degan umiddamiz.