Noshir va Nosir so'zi

Taniqli yozuvchi Nosir Fozilov 60 yildan ziyodroq turli nashriyotlarda, jurnal tahririyatlarida adabiy xodim, bo'lim mudiri, mas'ul kotib vazifalarida ishlagan. Ana shu ish faoliyatida ko'plab qo'lyozmalarni o'qib, asarlarga to'g'ri tashxis qo'yishga va ulardagi kamchiliklarni tuzatish yo'llarini mualliflarga tushuntirishga, ularga to'g'ri yo'l ko'rsatishga harakat qilgan. O'qigan asarlari haqidagi fikr-mulohazalarini ba'zan taqriz shaklida, ba'zan maqola shaklida, ba'zan esa turli suhbatlarda bayon etgan. Yozuvchining tajribalari, adabiyotga qarashlari, suhbatlari, taqrizlari hozir va bundan keyin ham nashriyot muharrirlari, qolaversa, ijod ahli uchun ibrat bo'ladi degan umiddamiz.