OYDIN TUNLAR

Buyuk rus adibi Dostoyevskiy (1821-1881) asarlari nafaqat Rossiyada, balki butun dunyoda sevib o‘qiladi, chunki u ijodi bilan jahon adabiyotiga katta ta’sir ko‘rsatgan, asarlari esa 170 dan ortiq tilga tarjima qilingan. Dostoyevskiy o‘z asarlarida ko‘pincha xo‘rlangan, ijtimoiy adolatsizlikka duchor bo‘lgan “kichkina odamlar”ning qismati hikoya qilingan. Shuningdek, roman va qissalarida aslzoda (dvoryan)larning ma’naviy-axloqiy tubanligini, mehnatkashlar shafqatsiz ekspluatatsiya qilinishini, rus “oqsuyaklari” tabaqasi, amaldorlari orasida ma’naviy qashshoqlik, amalparastlik, ochko‘zlik va xudbinlik kabi illatlarning chuqur ildiz otganini ayovsiz fosh etadi. Uning asarlarini o‘qir ekansiz, o‘sha davr jamiyati va insonlar o‘rtasidagi chuqur ziddiyat, ruhiy inqiroz va fojiaga guvoh bo‘lasiz. Qo‘lingizdagi ushbu kitobda adibning “Oydin tunlar”, “Ma’suma” va “Kulgili odamning tushi” asarlari o‘rin olgan. Marhamat, zavq bilan o‘qing!