QUYOSH QORAYMAS

Ma'lumki, ikkinchi jahon urishi davrida bir qator yozuvchilarimiz harbiy jurnalist sifatida frontga borib, shiddatli janglarni o'z ko'zlari bilan ko'rganlar, jangchilar bilan suhbatlar qilib, ular haqida ocherk, maqola va xabarlar yozganlar, o'zlarining bo'lg'usi badiiy asarlar uchun manba va ma'lumotlar yig'ganlar. Xalqimizning buyuk adibi Oybek ham urushning dastlabki yillaridayoq, aniqrog'i, 1942-yilning dekabridan 1943-yilning mart oyiga qadar G'arbiy frontda — Moskva, Voronej, Kursk, Belgorodda — jang qilayotgan o'zbek jangchilari orasida bo'lib, ularning mardona kurashlari haqida manba va ma'lumotlar to'plagan. Keyinchalik Oybek ana shu to'plagan manba va ma'lumotlar asosida bir turkum she'rlarini, "Front bo'ylab" yo'l xotiralarini, "Quyosh qoraymas" romanini va "Shonli yo'l" kinossenariysini yozgan. Bu haqida Oybek o'zining qisqacha tarjimai holida shunday yozadi: "O'g'ir urush yillarida men "Quyosh qoraymas" degan yangi roman ustida ish boshladim. Ikkinchi jahon urushi frontlaridagi o'zbek jangchilarini ko'rsatishga harakat qildim. Men artistlar brigadasi bilan frontga borgan bo'lsam ham, u yerda brigadadan ajralib qoldim. Chunki faqat sharoitni, kishilarni chuqur o'rganibgina jangchi va komandirlarning qahramonligi haqida asar yozish mumkinligini angladim va frontda uch oy qolib ketdim..." Hurmatli kitobxon! Qo'lingizdagi ushbu kitobdan Oybekning "Quyosh qoraymas" romani va "Shonli yo'l" qissalari o'rin olgan. Ushbu kitobni o'qir ekansiz, Bektemir, Ali tajang, Asqar polvon, Aljon, Hoshimjonlar obrazidagi yurtdoshlarimizning janglarda qanday qahramonliklar ko'rsatganiga o'zingiz guvoh bo'lasiz. Marhamat, iftixor bilan o'qing!