SULTON JALOLIDDIN MANGUBERDI

Vatanimiz tarixining ogʻir va musibatli zamonlari moʻgʻul bosqini va istibdodi davri voqealarini yoritishga bagʻishlangan ushbu kitob koʻplab oʻquvchilarning istagiga binoan qayta nashr etilmoqda. Oʻrta Osiyoning gullab-yashnagan voha va vodiylariga Chingizxon boshliq bosqinchilarning qora quyun kabi bostirib kelishi, sivilizatsiya nuri bilan munavvar, obod qadim shaharlarning vayron qilinishi, koʻz koʻrib quloq eshitmagan qonli qirgʻinlar, talon-tarojliklar, zulm va zulmatga bostirilgan elu elatning yoʻqlik qaʼrida gʻoyib boʻlishi fojiali va tarixiy voqealar, faktlar yozuvchi xayoli vositasida badiiy qobiq, badiiy shakl kasb etgan. Romandagi voqea va hodisalar, personajlarning xatti-harakatlari Xorazmday ulkan va qadim davlatning tanazzuliga sababchi boʻlgan Xorazmshoh va volidasi Turkon xotun obrazlari atrofida mujassamlashgan. Boshqa obrazlar esa ana shu ikki hukmdorning fojiali, dramatik qismatiga dinamik tarzda tutashadi. Ular shahzoda Sulton Jaloliddin Manguberdi va Temur Malik, Najmiddin Kubro va boshqalardir. Xalq qahramoniga aylangan Sulton Jaloliddin Manguberdi va Temur Malikning qismati garchi, fojiali yakun topsa-da, ularning qahramonliklari avlodlar uchun oʻrnak va saboqdir.