Xorazmning so'nggi malikasi

Ustoz yozuvchi Sa'dulla Siyoyevning ismini eshitganingizdayoq yuzingizga tabassum yuguradi. Chunki u kishining hajviy hikoyalari, ichakuzdi hangomalari gazeta, jurnal sahifalarida, televideniyadagi hajviy va yumoristik ko'rsatuvlarda ko'p yillardan beri million-million kishilarga samimiy kulgi ulashib kelgan va kelmoqda. Muallifning ilk hikoyalari bilan 1963 yilda ko'z ochgan ijod bulog'i hanuz qaynab-toshib turibdi. Bu yillar davomida Sa'dulla aka 30 dan ziyod katta-kichik kitoblarni chop ettirdi. Roman, qissa, hikoya, hajviya, badialarning bir qanchasi rus tilida bosmadan chiqqan. «Ahmad Yassaviy» romani Xitoyda uyg'ur tiliga tarjima qilinib, nashr etildi. «Og'ir vaznli janjalkash», «Erkaklar ertagi», «Yolg'onchining rost gapi» kabi o'nlab to'plamlar, «Avaz» romani va boshqa ko'plab kuldirgivchi va o'ylatguvchi asarlari allaqachonlar xalqimizning ko'ngil mulkiga aylanib ulgurgan. Mazkur to'plamga ham adibning ellik yillik ijod mahsuli namunalarining qaymog'i suzib olindi... Qolgan gaplarni kitob mutolaasidan so'ng so'zlasharmiz...