Yetti majlis

Jaloliddin Rumiyning ilmiy va adabiy merosi gʻoyat katta. Gʻazal, masnaviy va ruboiylarni oʻz ichiga oladigan “Devoni kabir” (“Ulugʻ devon”), falsafiy-sufiyona mushohadalar, ruhiyat dialektikasini kashf etib, inson aqlini lol qoldiradigan teranlik bilan yozilgan “Masnaviy-maʼnaviy”, “Maktubot”, “Fihi mo fihiy” (“Ichindagi ichindadir”) nomli asarlarini butun dunyo sevib oʻqiydi. Rumiy oʻz asarlarida odamni tadqiq etadi, uning tabiati va intilishlarini kuzatadi, botiniy jilvalar va surilishlar, qalb siljishlarini qidirib topadi. Rumiy asarlaridagi joziba shu qadar inson koʻngliga yaqinki, uning har bir soʻzi – bir mayoq, umr yoʻllarini yorituvchi chiroq, qalbga qoʻyiladigan ziyo kabidir. Jaloliddin Rumiyning buyukligi yana shundaki, u islomning ulugʻ shoiri va mutafakkiri boʻlishi holda boshqa mazhablar va dinlardan yuqori koʻtarila oldi, bani basharni birlashtiruvchi yagona ilohiy gʻoyalarni olgʻa surib, kishilarni bir-biriga yaqinlashtiruvchi eʼtiqod va iymon, ishq va sigʻinish, poklik va tavbadan soʻz ochdi. “Choʻplar muxtalif, ammo maqsad bir, yaʼni Olloh huzuri”, deya Ulugʻ Tangri haqiqati Olloh jami mahluqot barobarligini isbotladi. Oʻquvchilar eʼtiboriga havola etilayotgan mazkur kitob Rumiy dunyosining yangi manzillarini ochadi, kitobxonni Rumiy bilan qayta yuzlashtiradi. Oʻz navbatida kitobxon ham asar vositasida mehrga, muhabbatga, chin insoniy tuygʻularga chanqoq qalbini qondiradi. Yangi kitob mutolaasi muborak, aziz zamondoshim!