Nafaqaxoʻr gʻazali
Xushxabar bormi birodar, to‘ldi paymonim mening,
Tushsa tezroq deb kutarman pensiyo — jonim mening.
Qishni ham qarshilab oldik, boshda ro‘zg‘or tashvishi,
Yangi paypoq olgani ham bo‘sh-ku hamyonim mening.
Boshlasa nolishni kampir to‘xtamas to kechgacha,
Bo‘lg‘usi yer birla yakson er degan shonim mening.
Gazga pul yo‘q — o‘lturarman, bitta mitti hujrada,
Yozda kirmas sof havo ham qishda zindonim mening.
Dilda toqat qolmadi chun mijja qoqmay ushbu tun,
Oh qani tong otsa-yu, “tiing” etsa tilponim mening.
Xushxabar keldi nihoyat, shukr aylar Mo‘ysafid:
“Ofarin, AyTida ilg‘or O‘zbekistonim mening!”
©️Mulla Jiring
